Poslovne vesti - Makedonija

Близу два милиони корисници на мобилен

Вкупниот број на претплатници на мобилната телефонија во Македонија достигна 1.947.274 претплатници, што е 95 отсто од вкупното население, објави Агенцијата за електронски комуникации (АЕК).

„Граѓаните месечно во просек остваруваат околу 91 минута разговори кон сопствената мобилна мрежа и 11 минути кон другите мобилни мрежи, додека во сопствената фиксна телефонија разговараат 135 минути, а 42 минути кон другите фиксни мрежи“, изјави на денешната пресконференција Васка Петрова раководител на секторот за анализа на пазарите.

Интернет услугата со широк опсег ја користат 41 отсто од домаќинствата, 65 отсто користат АДСЛ и 30 отсто кабелски интернет.

Испитувањето на јавното мислење за пазарот на електронски комуникации покажало дека 73 отсто од граѓаните се задоволни од цените на мобилните оператори, а 92 отсто се задоволни од квалитетот на говорните услуги.Најголем удел на пазарот на мобилна телефонија има операторот „Т мобиле“ со 61,2, по што следи „Оне“ со 22 отсто и „Вип“ со 17 отсто.

„Дури 78 отсто од граѓаните што користат мобилен сметаат дека во случај да се појави нов мобилен оператор, треба да понуди подобри цени за разговор“, рече портпаролот  на АЕК Марјан Пејовски.

Услугата преносливост на број до сега ја искористиле 26.956 корисници на фиксната телефонија  и 16.212 на мобилната.

Користењето на пакет, кој вклучува интернет, телефонија и телевизија е во постојан подем и досега за оваа опција се одлучиле 34 отсто од граѓаните, 64 отсто користат посебни раздвоени услуги, додека два отсто не користат услуги од оваа област.

Агенцијата најави намалување на големородажната цена на завршување на повик помеѓу мобилните оператори и изјавија дека на овој начин дирекно се влијае врз висината на цената за мобилни телефонски услуги.

Од Т-Мобиле моблниот оператор посочија дека нивната малопродажна цена е веќе на ниско ниво во споредба со останатите европски земји, но немаат официјален одговор се додека не заврши јавната расправа.

Од мобилниот оператор Вип изјавуваат дека со намалување на големопродажната цена се отвора можност за намалување и на малопродажните цени за повици кон другите мобилни мрежи.